Kev Txuas Sij Hawm Dua Tshiab Txog Kev Muaj Cai Tsim Nyog Tau Txais MA thiab MinnesotaCare

Yog tias koj muaj Kev Pab Cuam Them Nqi Kho Mob (Medical Assistance, MA) los sis MinnesotaCare, ces Department of Human Services (Feem Hauj Lwm Saib Xyuas Kev Pab Cuam Tib Neeg (DHS)) yuav tsum tshuaj xyuas koj qhov kev muaj cai tsim nyog tau txais ib xyoos ib zaug txhawm rau xyuas seb koj puas tseem muaj cai tsim nyog. Tus txheej txheem no raug hu ua kev rov txuas sij hawm dua tshiab.

Kev txuas sij hawm dua tshiab txog kev muaj cai tsim nyog tau txais MA
Thaum txog lub sij hawm rov txuas sij hawm MA dua tshiab tau, DHS yuav xa ib tsab ntawv ceeb toom tuaj piav qhia koj txog yam yuav tau ua.
- Yog tias peb tuaj yeem txuas sij hawm rau koj li MA dua tshiab kiag, ces peb yuav xa ib tsab ntawv ceeb toom thiab ib daim ntawv suav sau cov ntsiab lus qhia paub tuaj rau koj. Koj yuav tsum tshuaj xyuas daim ntawv suav sau cov ntsiab lus qhia paub kom paub tseeb tias tag nrho txhua yam ntaub ntawv hais txog koj thiab koj tsev neeg puav leej raug lawm. Koj tsis tas yuav ua ib yam dab tsi li, tshwj kiag tias yog koj muaj kev hloov pauv los sis hloov kho kom raug rau hauv daim ntawv tshaj qhia nkaus xwb.
- Yog tias peb tsis tuaj yeem cia li txuas sij hawm rau koj li MA dua tshiab tau, ces peb yuav xa daim foos rov txuas sij hawm dua tshiab rau koj kom muab sau kom tiav, kos npe rau thiab muab xa rov tuaj. Koj yuav tsum xa daim foos rov qab nrog cov ntaub ntawv pov thawj uas xav tau tsis pub dhau hnub kawg. Thaum peb tau txais koj daim foos rov txuas sij hawm dua tshiab uas sau tiav tag lawm, ces peb yuav txiav txim siab seb koj puas muaj cai tsim nyog tau txais kev pab them nqi kho mob.
Kev txuas sij hawm dua tshiab txog kev muaj cai tsim nyog tau txais MA
Kev txuas sij hawm dua tshiab rau kev muaj cai tsim nyog tau txais MinnesotaCare

Thaum txog lub sij hawm rov txuas sij hawm rau MinnesotaCare dua tshiab lawm, DHS yuav xa ib tsab ntawv ceeb toom rau koj tuaj piav qhia koj txog yam yuav tau ua.
- Yog tias peb tuaj yeem txuas sij hawm koj li MinnesotaCare dua tshiab tau, ces peb yuav xa ib tsab ntawv ceeb toom thiab ib daim ntawv sua cov ntsiab lus qhia paub tuaj rau koj. Koj yuav tsum tshuaj xyuas daim ntawv suav sau cov ntsiab lus qhia paub kom paub tseeb tias tag nrho txhua yam ntaub ntawv hais txog koj thiab koj tsev neeg puav leej raug lawm. Koj tsis tas yuav ua ib yam dab tsi li, tshwj kiag tias yog koj muaj kev hloov pauv los sis hloov kho kom raug rau hauv daim ntawv tshaj qhia nkaus xwb.
- Yog tias peb tsis tuaj yeem cia li txuas sij hawm rau koj li MinnesotaCare dua tshiab tau, ces peb yuav xa daim foos rov txuas sij hawm dua tshiab rau koj kom muab sau kom tiav, kos npe rau thiab muab xa rov tuaj. Koj yuav tsum xa daim foos rov qab tsis pub dhau hnub kawg. Thaum peb tau txais koj daim foos rov txuas sij hawm dua tshiab uas sau tiav tag lawm, ces peb yuav txiav txim siab seb koj puas muaj cai tsim nyog tau txais kev pab them nqi kho mob.
Cov lus nug nquag
Kev txuas sij hawm yog dab tsi?
Kev txuas sij hawm yog kev tshuaj xyuas txog koj li nyiaj khwv tau los thiab lwm cov ntaub ntawv los saib seb koj thiab lwm tus neeg hauv koj tsev neeg puas tseem muaj cai tau txais Medical Assistance (Kev Pab Them Nqi Kho Mob, MA) los sis MinnesotaCare.

Kuv yuav tau txuas sij hawm rau kuv li kev tuav pov hwm kho mob tuab npaum li cas?
Feem ntau lawm cov neeg tso npe hauv MA thiab MinnesotaCare yuav tau rov txuas sij hawm dua ib xyoos ib zaug.

Kuv tau tso npe ntev tshaj ib xyoos lawm.Vim li cas kuv thiaj tseem yuav tau rov txuas sij hawm dua rau kuv li Medical Assistance (Kev Pab Them Nqi Kho Mob) los sis MinnesotaCare?
Txhawm rau hwj xwm kom koj muaj kev tuav pov hwm kho mob thaum lub sij hawm muaj xwm txheej ti tes ti taw txog kab mob COVID-19, feem ntau lawm MA thiab MinnesotaCare cov kev txuas sij hawm tau nres tag lawm. Cov kev txuas sij hawm yuav rov pib dua.

Vim li cas kuv thiaj yuav tsum tau ua kom tiav qhov kev rov txuas sij hawm?
Yuav tsum tau ua qhov kev rov txuas sij hawm los tshab xyuas koj li kev muaj cai tau txais txhawm rau seb koj puas tseem muaj kev tsim nyog rau kev pab them kev tuav pov hwm rau txoj kev noj qab haus huv.

Thaum twg kuv yuav tau txais kuv cov foos txuas sij hawm?
Yog tias koj muaj MA, koj tuaj yeem tau txais cov foos txuas sij hawm thaj tsam li ob hlis ua ntej lub hli uas koj ua ntawv thov kev tuav pov hwm kho mob thawj zaug. Piv txwv li, yog tias koj ua ntawv thov nyob rau Lub Xya Hli Ntuj, ces koj cov foos thov txuas sij hawm rau MA yuav raug xa pais xab nis tuaj rau koj nyob rau lub Tsib Hlis Ntuj. Tsis txhob txhawj yog tias koj tsis nco qab tias koj ua ntawv thov thaum twg lawm. Peb yuav xa cov foos txuas sij hawm hauv pais xab nis tuaj rau koj thaum nws txog sij hawm txuas sij hawm rau koj li MA.

Yog tias koj muaj MinnesotaCare, ces koj tuaj yeem yuav tau txais cov foos rov txuas sij hawm dua nyob rau Lub Kaum Hli Ntuj Xyoo 2023.

Kuv yuav ua li cas thaum nws txog sij hawm rau kuv rov txuas sij hawm dua lawm?
Thaj tsam li rau lub lim tiam ua ntej yuav xa koj cov foos rov txuas sij hawm dua tuaj rau koj, peb yuav xa ib tsab ntawv rau koj kom npaj txhij thiab saib rau koj li kev txuas sij hawm dua hauv kev xa pais xab nis.

Thaum nws txog sij hawm rau koj rov txuas sij hawm dua, peb yuav muab cov foos rov txuas sij hawm dua thiab cov lus qhia xa tuaj rau koj hauv pais xa nis.

Kuv yuav tau txais cov foos rov txuas sij hawm rau txoj hauv kev twg?
Koj yuav tau txais cov foos rov txuas sij hawm raws kev xa raws pais xab nis. Peb yuav muab nws xa mus rau qhov chaw nyob pais xab nis uas peb muaj nyob hauv ntaub ntawv rau koj li xwm txheej MA los sis MinnesotaCare.

Kuv yuav ua li cas kom ntseeg tias kuv tau txais kuv cov foos rov txuas sij hawm dua nyob hauv kev xa raws pais xab nis?
Yog tias koj hloov chaw nyob, ces nco ntsoov qhia koj qhov chaw nyob tshiab kiag tam siv.

Yog tias koj muaj MA, los sis koj tsev neeg muaj MA thiab MinnesotaCare tib si, ces hu koj lub khauj tim los sis lub koom haum saib xyuas haiv neeg.

Yog tias koj muaj MinnesotaCare, ces hu rau DHS Feem Txhawb Nqa Cov Neeg Tuaj Saib Xyuas Kho Mob ntawm tus xov tooj 651-297-3862 los sis 800-657-3672.

Kuv puas tuaj yeem thov tau kev pab ua kuv daim foos rov txuas sij hawm?
Koj tuaj yeem thov tau kev pab sau kom tiav koj daim foos rov txuas sij hawm los ntawm:
- Kev hu xov tooj mus rau los sis kev mus saib Tus Neeg Coj Kev Uas Muaj Ntawv Pov Thawj Los Ntawm MNsure. Lawv tuaj yeem pab teb tau koj cov lus nug los sis pab koj sau daim foos rov txuas sij hawm. Mus rau Phau Ntawv Teev Npe Tus Neeg Pab txhawm rau nrhiav tus neeg coj kev uas tuaj yeem pab tau koj thiab uas hais tau koj hom lus.
- Yog tias koj muaj MA, ces txuas lus rau koj lub chaw ua hauj lwm hauv cheeb tsam nroog los sis hauv pawg neeg me txhawm rau thov kev pab.
- Yog tias koj muaj MinnesotaCare, los sis koj tus coj hauv tsev neeg muaj MA thiab MinnesotaCare tib si, ces txuas lus rau DHS Lub Chaw Pab Txhawb Neeg Siv Kev Pab Cuam Fab Kev Saib Xyuas Kev Noj Qab Haus Huv (Health Care Consumer Support) ntawm 651-297-3862 los sis 800-657-3672.
Kuv puas yuav tsim nyog xa daim ntawv pov thawj txog kuv qhov nyiaj khwv tau los nrog rau kuv daim foos rov txuas sij hawm?
Tsim nyog. Xa daim ntawv pov thawj txog koj qhov nyiaj khwv tau los nrog rau koj daim foos rov txuas sij hawm. Tej zaum nws yuav pab tau peb lis koj qhov kev rov txuas sij hawm kom ceev zog ntxiv. Suav nrog:
- Cov ntawv them nyiaj nqi ua hauj lwm rau cov neeg uas muaj cov nqi nyiaj ua hauj lwm
- Daim ntawv xa se nyiaj khwv tau los rov qab rau foom fwv uas tshiab tshaj plaws los sis cov ntaub ntawv sau tseg txog lag luam rau cov neeg uas yus ua yus hauj lwm.
- Cov ntaub ntawv sau tseg los sis cov ntawv theej ntawm cov tshev yog tias koj muaj lwm hom nyiaj khwv tau los.
Kuv yuav xa daim foos rov txuas sij hawm uas tau sau tiav lawm mus rau qhov twg?
Xa daim foos ntawd rov qab mus rau lub chaw hauj lwm uas muaj npe nyob rau hauv tsab ntawv thov uas los nrog koj daim foos rov txuas sij hawm. Yog tias koj tsis muaj tsab ntawv thov mus ntxiv lawm thiab koj muaj MA, ces txuas lus rau koj lub chaw ua hauj lwm hauv cheeb tsam nroog los sis hauv pawg neeg me. Yog tias koj tsis muaj tsab ntawv thov mus ntxiv lawm thiab koj muaj MinnesotaCare, los sis koj tus coj hauv tsev neeg muaj MA thiab MinnesotaCare tib si, ces txuas lus rau DHS Lub Chaw Pab Txhawb Neeg Siv Kev Pab Cuam Fab Kev Saib Xyuas Kev Noj Qab Haus Huv (Health Care Consumer Support) ntawm 651-297-3862 los sis 800-657-3672.

Yuav muaj dab tsi tshwm sim yog tias kuv tsis xa kuv daim ntawv rov txuas sij hawm rov qab?
Koj li kev pab them kev tuav pov hwm rau txoj kev noj qab haus huv yuav xaus.

Kuv xav tias tej zaum kuv yuav tsis muaj kev tsim nyog dab tsi ntxiv lawm.Kuv puas tseem yuav tsum tau ua kom tiav kuv daim foos rov txuas sij hawm?
Tau ua, yog tias koj xav kom peb txiav txim seb koj puas tseem muaj kev tsim nyog, los sis saib seb koj puas muaj cai tau txais lub khoos kas tuav pov hwm kev noj qab haus huv uas sib txawv.

Kuv puas tuaj yeem xa tau kuv daim foos rov txuas sij hawm rov qab tom qab hnub tim tag sij hawm?
Tuaj yeem xa tau. Sau kom tiav thiab xa koj daim foos rov txuas sij hawm rov qab kom sai li sai tau raws li koj tuaj yeem ua tau, txawm tias koj li kev pab them tau xaus lawm los xij. Peb yuav ua zoo saib rau koj qhov xwm txheej dua ib zaug ntxiv yog tias peb tau txais koj daim foos rov txuas sij hawm nyob rau hauv plaub lub hlis tom qab koj qhov kev pab them raug kaw. Tom qab ntawd, koj yuav tsum rov thov dua.

Thaum twg kuv daim foos rov txuas sij hawm dua tshiab thiaj li yuav raug lis?
- Cov foos rov txuas sij hawm dua tshiab yuav raug lis ib daim zuj zus raws li thaum tau txais nyob rau ntawm koj lub cheeb tsam nroog los sis haiv neeg lub chaw ua hauj lwm los sis ntawm DHS.
- Koj qhov kev rov txuas sij hawm dua tshiab yuav siv sij hawm ntev dua yog tias sau tsis txhij tsis txhua los sis tsis kos npe rau. Teb kom tag nrho txhua nqe lus nug thiab kos npe rau koj daim foos rov txuas sij hawm dua tshiab txhawm rau pab kom peb lis daim ntawv kom sai dua.
- DHS yuav ceeb toom rau koj paub thaum koj daim foos rov txuas sij hawm dua tshiab raug lis tiav lawm. Peb yuav xa ib daim ntawv ceeb toom qhia paub yog tias peb xav tau cov ntaub ntawv ntxiv los ntawm koj txhawm rau los txiav txim siab txog koj qhov kev muaj cai tsim nyog. Peb yuav xa ib tsab ntawv ceeb toom qhia rau koj tias seb koj qhov kev muaj cai tsim nyog puas tau txuas sij hawm dua tshiab lawm.
Yog tias kuv muaj MinnesotaCare, kuv yuav tsum paub dab tsi txog kuv tus nqi them tuav pov hwm rau MinnesotaCare thaum lub sij hawm rov txuas sij hawm dua tshiab?
- Kav tsij them tus nqi uas muaj nyob hauv koj daim ntawv sau nqi txuas mus ntxiv. Koj tus nqi them tuav pov hwm rau MinnesotaCare yuav tuaj yeem hloov pauv tau tom qab koj daim foos rov txuas sij hawm dua tshiab raug lis tiav lawm.
- Cov ntawv ceeb toom txog qhov nqi them tuav pov hwm uas koj tau txais thaum Lub Kaum Ib Hlis Ntuj thiab Lub Kaum Ob Hlis Ntuj yuav qhia tus nqi them tuav pov hwm tias "tsis tau paub" los hloov tus nqi uas qhia kiag cov nyiaj. Yog tias koj twb yeej muab koj daim foos rov txuas sij hawm dua tshiab xa rov qab tuaj lawm, ces qhov no txhais tau tias nws tsis tau raug lis tiav los sis tsis tau laib txais los sis lub chaw ua hauj lwm tseem tab tom tos cov ntaub ntawv ntau ntxiv los ntawm koj. Yog tias koj tsis tau xa koj daim foos rov txuas sij hawm dua rov qab tuaj, ces koj yuav tsum muab xa rov qab tsis pub dhau hnub kawg, yog tsis li ces koj qhov kev muaj cai tsim nyog yuav xaus rau Lub Kaum Ob Hlis Ntuj Tim 31.
Tiv tauj peb